今晚意盃16强焦点战，「紫百合」费伦天拿主场火併国际米兰。「紫百合」喺柏兰迪利回巢执教后略有起色，虽然国米实力更强，但攻强守弱问题未见改善，加上嚟紧联赛要大战祖云达斯，今仗随时收起部分主力，转玩2.5球嘅入球大。

国米副选把关防线脆弱

开季表现奇差嘅费伦，自从上年11月搵柏兰迪利接手后，捱过初段不济后渐入佳境，近6场取得2胜3和仅1败，包括作客爆冷大胜祖记3比0，呢6场更只得1场冇波入，其中前锋杜辛华荷域喺其馀5场都有士哥，就算老将列贝利缺阵都冇有怕。

国米攻力坚劲，单计今季联赛已入43粒，暂时係意甲火力最强球队，卢卡古伙拍拿达路马天尼斯就佔咗其中21粒。由于「蓝黑兵团」已缘尽今届所有欧洲赛，争冠目标剩番国内赛事，因此联赛同意盃都会搏尽，战意唔使怀疑。但要留意，国米下仗联赛要喺主场迎战死敌祖记，关乎争冠同面子，可以话唔输得，主帅干地今场可能会作出适量轮换。

有传国米后备门将拉度会代替队长汉丹洛域，守将兰奴捷亚同高拉洛夫会担正，令本已不稳嘅防线更为脆弱，虽然预计卢卡古会休息，但代替佢嘅阿历斯山齐士早前对森多利亚宴客孭晒镬，今仗一定要争取表现。睇番国米近6场作客全开3球或以上，包括上仗反先下仍被罗马末段逼和2比2，可见佢哋攻强守弱，转捧2.5球嘅大盘最上算。