周日凌晨英格兰足总盃第3圈焦点战，衞冕嘅阿仙奴主场火併「喜鹊」纽卡素。阿仙奴主帅阿迪达穷则变、变则通，改以加比尔马天尼利等小将为首所刮起嘅青春风暴，成功由谷底反弹，同时激起老将斗心争取表现，衞冕第1击遇上近况低沉嘅纽卡素，阿仙奴热W要捧。

　　阿仙奴早前一度本土赛事8场不胜，主帅阿迪达深陷被炒危机，喺限米煮限饭下，佢毅然重用19岁嘅加比尔马天尼利同20岁嘅伊美路维，配合19岁新人王布卡约沙卡，中前场活力十足，连续3场联赛全胜共轰8球，之前为人诟病嘅中场缺乏创造力问题，一扫而空。

　　虽然「青春3人组」今场或有部分球员获得轮休，但小将们出色嘅表现，令阿仙奴老将韦利安、大衞雷斯同「贵价货」尼高拉斯比比感地位不保，激起佢哋战意，近期脚风欠顺嘅队长奥巴美扬，亦需要争取士哥，以挽回领队阿迪达对佢嘅信任。

　　纽卡素护级无暇兼顾
　　相反，纽卡素颓势未止，连同盃赛在内，近6场只得2和4负，唔单止喺圣诞新年快车赛期未赢过，更喺英联盃8强被英冠球队宾福特淘汰，非常羞家，攻守主力拿修斯、赖恩费沙同辛特麦斯明，因受伤同确诊新冠肺炎而需倦勤，实力受削，依家仍然处于护级漩涡，无暇兼顾盃赛。翻查纪录，双方近15次正面交锋，阿仙奴豪取14胜1负，单计主场近8次碰头全部获胜，全面剋死「喜鹊」，要闯过衞冕之路首关冇难度，主胜好路。