聯賽炒過紅軍信心倍增
英格蘭足總盃第3圈今晚開打，打頭陣有兩場全英超對決，重頭戲
阿士東維拉主場斗
利物浦。維拉今季聯賽曾經喺主場爆冷大勝利物浦7比2，今次再於地頭出戰未驚過；「紅軍」今季作客成績曳到爆，加上主帥高普一向唔多重視英足盃，作客讓波信唔過，波童揀維拉下盤。（周六凌晨3時45分開賽）
兩軍今季聯賽首循環交鋒製造出驚人戰果，主場出擊嘅阿士東維拉憑奧尼屈堅斯連中三元，以7比2大炒利物浦，令「紅軍」成為首支單場失7球嘅英超衞冕球隊，當時外界普遍認為佢哋只係偶然發揮失准，不過之後「紅軍」7場聯賽作客只得1勝5和1負，包括剛戰以0比1不敵修咸頓，證明利物浦今季作客演出遠在水准之下；相反維拉愈戰愈勇，聯賽目前以15戰得26分排第8位，比1哥利物浦少7分但少踢兩場，具備爭上前列嘅實力，今次再喺主場出戰，心理上都有一定優勢。
取消重賽！90分鍾和波踢加時
自從高普喺2015年10月接掌「紅軍」帥印，過去5屆英足盃最叻只試過1次躋身16強，如果單計第3圈成績，利物浦近5屆法定時間亦只得2勝2和1負，有兩次需要重賽先過關；高普向來喜用副選出戰本土盃賽，變相減低戰斗力，翻查紀錄，「紅軍」近6場英足盃作客法定時間只得1勝3和2負，其中包括打和埃克塞特、梳士貝利等低組別隊伍，故此今場不宜對佢哋抱太高期望，維拉今場受讓平半，下盤值得支持。順帶一提，今屆英足盃取消重賽，所有比賽以1場過決勝負，90分鍾打和將加時30分鍾，再和則以互射12碼分勝負。
