英超今个周末暂停战火，改为上演英格兰足总盃第3圈赛事；虽然过去10届英足盃有9届由Big 6球队夺标，不过讲到第3圈比赛近年亦有唔少冷门战果出现，礼拜六晚早场就有场爱华顿主场斗英冠洛达咸；计牌面爱华顿无疑远胜对手，不过爱华顿近年喺第3圈主场对低组别对手甚少以大比数胜出；洛达咸踢法进取，对上6场英足盃只有1场冇入波，预计有力与爱华顿斗攻合演入球*。

　　爱华顿今季喺安察洛堤带领下成绩稳步上扬，呢名意大利主帅曾带领车路士赢过2009/10英足盃冠军，既然「拖肥」今季走势咁好，当然希望再尝捧盃滋味。睇番爱华顿对上5届英足盃第3圈有两次遇上低组别对手，分别係2015/16对杜根咸及2018/19对林肯城，虽然最终都能赢波晋级，不过两次主场出击都未试过淨胜3球或以上，如果让波太多有一定风险。

　　洛达咸踢法进取
　　今季由英甲升上英冠嘅洛达咸目前于联赛榜排尾二，只比包尾嘅韦甘比多1分，护级水深火热，势难分心应付盃赛，而且洛达咸对上4届英足盃从未试过突破第3圈，其中2018/19球季以英冠身份作客曼城更惨吞7蛋，实力上同英超球队有一段距离。不过洛达咸风格主攻，近5场比赛只有1场冇入波，总计近6场英足盃赛事，洛达咸亦只有喺曼城身上未能攞到入球，其馀5仗攻入12球，有5次总入球更达4球或以上，呢场睇怕入球*走唔甩。