埃及文明齐脚攻坚

　　英超圣诞新年快车尾站，今晚嚟到压轴尾场，「圣人」修咸顿主场火併1哥利物浦。修咸顿射手丹尼艾格斯伤愈后未弗，令火力大减致战绩下滑，而且近年碰头被利物浦食住，王牌穆罕默德沙拿更加係「圣人」剋星，为止跌势必搵「圣人」祭旗，喺2021年打响头炮，客胜正路。（Now 621周二凌晨4时直播）

　　榜首嘅红军连续2场联赛打和失分，包括上场被纽卡素闷和0比0，今季联赛首次食白果，已经畀曼联追到同分，仅凭得失球差数字较佳先做到1哥，为咗争标不容再失。

　　虽然利物浦目前仍有不少伤兵，最近连祖尔麦迪比、拿比基达亦告受伤，好彩「埃及文明」穆罕默德沙拿、沙迪奥文尼及罗拔图法明奴冇伤冇病，日本国脚南野拓实亦逐渐融入，需要轮换时有更多选择。值得一提嘅係，王牌沙拿对亲修咸顿特别醒神，近6次碰头攻入7粒，协助红军赢晒，明显对「圣人」脚风奇顺。

　　艾格斯伤愈后未谷起

　　今季异军突起嘅修咸顿，踏入上年12月中明显跌Watt，尤其喺坚频密嘅圣诞新年快车赛程，对兵源有限嘅「圣人」考验极大。其中伤愈冇耐嘅射手、今仗倒戈嘅丹尼艾格斯连场食白果，「罚球王」禾*斯又冇乜佳作，连同上周中主场同韦斯咸互交白卷在内，近4场联赛只得3和1负仅入1粒，冇晒火力，众将喺欠缺轮换之下疲态毕露，相信难以抵挡1哥来袭，简简单单捧客胜。