护级专家「大Sam」艾拿戴斯执教嘅西布朗，喺周日凌晨再度出击，主场迎战阿仙奴。西布朗目前深陷降班漩涡，艾拿戴斯面对实力强横劲旅必「泊大巴」，早前对利物浦就以「6-4-0无锋阵」成功抢分，今场面对阿仙奴一众疲兵将会作出顽强抵抗，预料入球唔会多，捧2.5球嘅入球细好路。

　　西布朗周中对列斯联虽然惨吞5蛋，但呢个战果更能证明球队目前阵容适合主守，抢攻只会自取灭亡，面对回勇嘅阿仙奴，艾拿戴斯必会再用对付利物浦嘅战术，屯重兵死守。

　　事实上，西布朗近年对阿仙奴战情都相当紧凑，而且入球唔多，两队过去5次交锋，4次总入球在2球或以下，相信今场亦唔例外。

　　「泊大巴」恰到阿仙奴
　　阿仙奴经历联赛7场不胜后，最近连赢车路士同白礼顿，领队阿迪达落台压力大减，不过阿仙奴今季进攻最大死穴，就係面对「泊大巴」球队束手无策，受制于西布朗死守战术，想入波都好难，入球细机会可谓高唱入云。