今晚英超頭場上演愛華頓主場斗韋斯咸，愛華頓捱過早前低潮期已強勢復甦，聯賽4連勝重返前4，加上上輪對曼城賽事因疫情延期，體力上比韋斯咸佔優，主隊讓平半建議捧上盤。

　　愛華頓今季開咧4連勝，但自從於默西賽德郡打吡賽和利物浦後，王牌佔士洛迪古斯受傷斷斷續續缺陣，其後5場聯賽「拖肥」輸4場，一度跌至第11位。不過，「拖肥」主帥安察堤洛改變策略，將中場派牌職責交畀基菲爾施古臣及阿倫盧利奧分擔，再配合伊禾比及李察利臣兩翼夾擊，等「佔士仔」可以專心休養，對上4場聯賽先後擊敗車路士、李斯特城、阿仙奴及錫菲聯，取得4連勝，再度重返聯賽榜前列位置，加上守將米克堅尼及史密斯高文等鎮守防線，今場唔怕韋斯咸來犯。

　　錘仔幫連場征戰有疲態
　　愛華頓今場另一個優勢，係原本周二凌晨主場對曼城嘅聯賽，因對手疑有多人確診需要延期，變相令「拖肥」有更多時間調整，喺聖誕、新年快車檔期有充分休息。相反，「錘仔幫」韋斯咸上場作客0比0打和修咸頓，近4場英超只得3和1負，對手包括水晶宮及白禮頓中下游球隊，表現明顯有疲態，對住養精蓄銳嘅「拖肥」自然更輸蝕，主隊小讓平半，上盤捧得過。