拖肥迎曼城

　　另一场英超重头戏，刚上升联赛榜第2位嘅爱华顿主场火併「蓝月亮」曼城。两军近期状态同样不俗，高手过招相信会踢得格外小心，尤其曼城近5场联赛有4场冇失波，总入球全开2球或以下，今场捧2.5球细好路。

　　「蓝月亮」近期防线对办

　　爱华顿昨晨凭中场基菲尔施古臣喺80分钟入波，作客以1比0绝杀榜尾锡菲联，联赛4连胜。未计寻晚成绩，「拖肥」目前只比榜首利物浦少两分，不过佢哋今场续有占士洛迪古斯、李察利臣、阿伦卢利奥及卢卡斯迪治尼等主力缺阵，睇番上场对锡菲联，「拖肥」控球时间虽然较多，但实际具威胁埋门唔多，射手卡维特利云近6场联赛仅入1球，发挥明显唔及季初锐利，今晚对住级数更高嘅曼城，应会先做好防守。

　　曼城昨晨喺主场出击2比0轻取纽卡素，联赛榜升至第5位，重返争标行列；英格兰国脚史达宁虽然冇波入，但先开纪录一球係由佢个人扭入禁区右路，冷静传交根度简射入，尽显级数。史达宁今季已有6次助攻，喺哥迪奥拿执教下，累积96个入波及54次助攻，成为哥帅入「城」以来首席进攻王，加上加比尔捷西斯确诊缺阵、阿古路伤愈状态未弗，史达宁表现更为关键。「蓝月亮」近期后防演出对办，近5场联赛有4场保持清白身，总入球全开2球或以下，今场捧细啱数。