绝处逢生愈踢愈顺

　　圣诞前夕西甲好波连场，周四凌晨就轮到皇家马德里登场，喺主场迎战CF格兰纳达。「银河舰队」早前绝处逢生，主帅施丹面临下台压力下连场取胜，不但欧联顺利晋级，联赛亦重返争标行列，今场对「私房菜」CF格兰纳达，估计一开波就抢，1.5球嘅半场入球大值得一试。

　　皇马近期强势反弹，阵中伤兵唔多，教练施丹可因应唔同对手调动人脚应战，捱过欧联及西甲双线作战嘅艰难时期之后，现时单独应付西甲更显得轻鬆，上仗作客赢伊巴3比1，全场佔尽上风。前锋宾施马近期弗到冇朋友，入球停不了，德国中场却奥斯亦喺前仗开斋，其馀3名攻击手云尼斯奥斯祖利亚、费达历高华维迪、卢卡斯华斯基斯都交出上佳表现，估计施丹将会继续起用呢个攻击阵容，应付格兰纳达。

　　CF格兰纳达有力驳火

　　CF格兰纳达今季表现中上，喺西甲及欧霸盃双线发展当中，季初曾击败前列分子之一嘅西维尔，欧霸盃分组赛亦顺利晋级，上场2比0赢贝迪斯，实力不容小觑。格兰纳达射手路尔斯苏亚雷斯近期脚风颇顺，连场取得入球，係球队得分主力，佐治摩连拿与谢曼山齐士亦喺适当时候作出贡献，苏尔达杜于上仗西甲起孖，今仗作客皇马预计会係一场激战。

　　双方近况同样出色，皇马虽然喺往绩上佔优，近4次交手全胜，但今仗胜负仍存在变数，从另一角度睇，既然双方攻力唔差，近4次联赛交手半场又全开2球或以上，今场一于信摊路，追捧半场大。