后防兵荒焗以攻代守

　　今晚英超尾场爆发前列大战，由利物浦主场火併李斯特城。利物浦伤兵成箩，防线更係重灾区，随时以攻代守，李城射手占美华迪脚风顺到冇朋友，撞正「红军」残爆防线，啱晒佢哋打反击，双方近年联赛碰头例演入球*，2.5球大盘有买趁早。

　　红军今季伤兵不断，国际赛期过后再添几名「十字兵」。其中王牌穆罕默德沙拿确诊新冠肺炎，右闸阿历山大阿诺特要休养1个月，中坚祖高美斯更重创需做手术有排抖，队长佐敦轩达臣亦未好番无缘披甲。虽然上月打吡战韧带受伤嘅铁衞华基尔云迪积克，近日迅速康复重返训练场做轻量训练，复原进展比预期理想，的确可提升士气，但佢几时先可复出仍属未知之数。

　　除此之外，喺国际赛带伤而回嘅左闸安德鲁罗拔臣，就算赶及披甲，状态亦未必十足。睇番利物浦今季8场联赛，只得1场冇失波，若非前锋沙迪奥文尼、迪亚高祖达交到货，用入波弥补失波，依家唔会只落后李斯特城1分，迪亚高祖达更喺近5次主场4场有入波，可见晏菲路球场係佢嘅福地。

　　李斯特城华迪专劏强队

　　未计今轮位居1哥嘅李斯特城，虽则喺国际赛头部撞伤嘅门神卡斯柏舒米高冇乜大碍，依然有苏恩古、列卡度彭利拿等后衞倦勤。好彩前锋占美华迪老而弥坚，就算早前受伤缺阵，但佢今季7次联赛上阵入8粒，其中4球係对住曼城及阿仙奴，总计历来喺英超对Big 6入咗38球，「强队杀手」绝非浪得虚名。难怪连盃赛在内，李城已连赢6场，单计联赛开季8场赢6场，狂轰18粒，火力拍得住利物浦。今场利物浦谷前抢攻，反而益晒李城有更多空位打反击。加上两军近8次联赛对碰，合共炮製29粒，有7次开3球或以上，斗攻格局必捧入球大。