世盃南美洲區外圍賽，哥倫比亞主場迎戰烏拉圭。兩軍前線齊曬腳，哥倫比亞擁有阿特蘭大兩位射手路爾斯梅利爾同杜雲沙柏達，再加埋好番嘅佔士洛迪古斯，火力驚人。烏拉圭亦重召曼聯前鋒卡雲尼，佢同老拍檔蘇亞雷斯合作有曬默契，今場對戰肯定多波入，捧2.5球入球大。

　　雙方都進行咗兩場比賽，哥倫比亞1勝1和，包括3比0大勝委內瑞拉，以及打和智利2比2。烏拉圭則先以2比1擊敗智利，但上場以2比4不敵厄瓜多爾。

　　效力意甲球隊阿特蘭大嘅一對哥倫比亞前鋒，路爾斯梅利爾同杜雲沙柏達喺球會合作無間，一早已經建立深厚默契，返到國家隊一樣交到貨，喺對委內瑞拉一役，兩人包辦3個入球。哥倫比亞隊長佔士洛迪古斯早前受傷，但今次有份入選大軍名單，相信呢位愛華頓中場已完全康復，由佢負責組織攻勢，哥倫比亞可謂如虎添翼。

　　卡雲尼搭阿蘇入球保證
　　烏拉圭前鋒蘇亞雷斯喺兩場外圍賽射入3球，呢名33歲老將今季由巴塞隆拿轉投馬體會之後，同樣表現出色，喺西甲已有5球進帳。至於蘇亞雷斯嘅老拍檔卡雲尼，自從上月加盟曼聯之後，已經操起狀態，上場英超更射入1球，呢名為烏拉圭射入50球嘅前鋒今次獲得重召，再同阿蘇合作攻堅，烏軍絕對有本錢同哥倫比亞斗攻；雙方近5次世盃外交手，有4次開3球或以上，2.5球入球大好路。