传统劲旅飞脚近年沦为护级分子，好彩今季大翻身，尤其係自9月中起疯狂发力，近11场联赛豪取9胜2和未输过。淨係安达臣柏历及渡边千真，喺呢11场便各入4粒，当中两人不乏后备入替建奇功嘅场面，连同艾迪美臣巴拉加、宇佐美贵史及井手口阳介等轮流发威，飞脚攻击点众多，令对手防不胜防。

易帅后一度有起色嘅胜利船，由于联赛被远远甩开，无论係争冠或下届亚冠盃席位已经无望，而且今届亚冠盃分组赛将在月尾喺卡塔尔重开，明显更为重要，近期亦开始避重就轻，近7场联赛只得1胜1和5负，包括输畀弱旅清水心跳同FC横滨，显得无心恋战。飞脚虽然争取联赛冠军机会淼茫，但仍要力保前2，除咗确保下届亚冠盃分组赛入场券之外，前2亦可直入今届日皇盃4强，为保争盃希望战意赢晒，主胜咪错过。

比马对水手捧大盘

尾场直播戏码，湘南比马主场对横滨水手。上季日职盟主水手联赛2连败，目前落后排第3嘅名古屋鲸鱼5分兼多踢3场，争入前3机会唔大，而且佢哋同胜利船一样，将于月底前往卡塔尔应付亚冠盃，依家打联赛都係练兵为主，赢输冇所谓，最紧要保持状态。比马经历早前联赛6连败后，近4场联赛取得2胜2和，明显回勇，虽然比马近3次联赛对水手输晒，但全部有士哥，包括今季首循环仅输2比3，加上水手近5场联赛只有1场冇失波，有4次开4球或以上，转捧3.5球嘅入球大更上算。