經過兩周國際賽，歐洲各地聯賽本周末重燃戰火，為遷就下周歐聯分組賽開打，法甲今晚安排兩場比賽，衞冕盟主巴黎聖日耳門（PSG）喺尾場作客斗尼姆。PSG今場雖然陣容不整，不過佢哋近4次對尼姆全部贏曬，共轟13球，實力贏對手成條街，而且今季法甲預期會比過去幾季爭持激烈，現排第4嘅PSG定必要搏盡，大炒可期。

　　PSG開季因受新冠疫情影響，喺部分主將缺陣下頭2輪聯賽輸曬，好在隨住一眾主力陸續康復，聯賽4連勝重返正軌，國際賽前一仗更以6比1大炒昂熱，重現霸氣。PSG今場有中場迪馬利亞、守將古沙華及馬昆奴斯哥利亞停賽，尼馬、基利安麥巴比、馬高華拉堤及達斯拿等周中踢完國際賽，匆匆歸隊未必踢足，但對手尼姆近年係PSG私房菜，過去4次交鋒尼姆全部輸曬，當中有3次淨輸3球或以上，實力上有一定距離，而且尼姆今場亦有多名主將缺陣，包括中場白賴恩乾停賽，前鋒迪派斯、中場薛迪沙亞、安東尼華拿里奧及杜積域俱有傷在身，情況唔好得過PSG幾多，想終止連敗走勢唔易。

　　雷恩入球大「安」心買

　　PSG過去幾季喺法甲一支獨秀，為留力歐聯有唔少失分空間，不過PSG季初表現失准，現時只排聯賽榜第4位，而且幾支爭標假想敵包括雷恩、里爾都有唔錯表現，PSG唔想被甩開亦要全力拚盡，定必盡數對手。

　　至於剛才提過嘅雷恩就會喺頭場作客斗迪安；現排榜首嘅雷恩開季6戰4勝2和未輸過，不過當中只有1場冇失波，近4戰場場至少3球交收，踢法攻強守弱；迪安6戰得1分失13球，呢場肯定大把士哥睇。