聽朝另一場世界盃外圍賽南美洲區賽事，傳統勁旅哥倫比亞主場迎擊委內瑞拉。論牌面主隊當然勝一籌，但喺疫情影響下，南美洲國家隊近1年未有比賽，久疏戰陣令合作性同隊形難免受影響。委內瑞拉自知技不如人，球員惟有走多步睇嚇偷唔偷到雞，預料入波唔多，捧2.5球入球細穩陣。

　　哥倫比亞上屆世盃外圍賽排第4，今屆主力陣容仍然維持，佔士洛迪古斯、法卡奧、古達度及奧斯賓拿等老大哥繼續擔當重任，其中「J神」今季更喺愛華頓重生，不過佢喺球會有唔少年輕隊友走位配合，返到國家隊身邊多為老將，活力驟減，未必可以發揮到佢最大威力。

　　委內瑞拉死守望搶分
　　事實上，原定3月展開嘅外圍賽因疫情推遲至10月，哥倫比亞對上一場賽事已經數到上年11月，葡萄牙籍主帥奎羅斯喺停擺期間直頭飛返歐洲，國家隊處於癱瘓狀態，對向來以組織性踢法為主嘅哥倫比亞嚟講，缺乏備戰影響相當大。

　　作客嘅委內瑞拉上屆外圍賽排包尾，不過曾經試過作客1比1打和阿根廷，同1比0贏巴拉圭，今場全軍退守，未必冇搶分機會。翻查往績，哥倫比亞近8次對委內瑞拉，有7次總入球開2球或以下，今場梗係追2.5球嘅細盤。