心跳练兵当踢热身赛

　　周三日职重头戏，横滨水手主场迎战清水心跳。心跳唔只6连败，而且近5仗半场全部落后，似乎对胜负一啲都唔着紧，原因係今季日职取消降班，心跳教练奇林莫夫斯基畀多啲青年球员上阵吸收经验，水手急欲反弹，定必藉地利抢攻对手，吼半场主胜。

　　由于疫情关係，今季日职不设降班，下季日乙前两名升班后，由20支球队争逐。换句话讲，清水心跳即使今季1场都唔赢，下季都可以继续喺日职竞逐，心跳教练奇林莫夫斯基就趁呢个机会练兵，畀多啲后生仔上阵，等佢哋吸收经验之馀，亦可以增加兵源应付下季多咗场数嘅日职赛事。

　　心跳6连败，除咗主场对柏雷素尔一役只换2名球员，其馀5场用尽5个换人名额，原则上奇帅係不停咁试唔同阵式，根本当今季係热身赛咁踢，几个「00后」球员铃木唯人、粟原伊巴谦等都有出场机会，其中前者更多次正选落场。

　　面对「让半臂」嘅心跳，水手唔赢真係对唔住自己，呢支上季盟主今季大跌Watt，现时只排第10，佢哋啱啱经历3连败，管理层有怨言，球队上下均有压力，今仗不容再失，求胜心切下定必速战速决，力求尽快取得入球，半场主胜值得捧场。