日職前列大戰，名古屋鯨魚周日主場火併1哥川崎前鋒。前鋒周中喺榜首戰大炒大坂櫻花後，今季聯賽累積至10勝1和不敗，並以10分拋離櫻花遙遙領先，佢哋11場攻入34球火力冠絕日職，作客攻擊力一樣強橫，今場作客鯨魚3.5球嘅入球大值博。

　　鯨魚攻擊孖寶擔正

　　川崎開季走勢凌厲，除咗聯賽首仗被鳥棲砂岩悶和0比0，日職重開後勢如破竹豪取10連勝，10仗攻入34球僅失9球，周中主場以5比2大勝排次席嘅櫻花，3位得分主力李安度達美奧、小林悠及三笘薰均有進帳，其中小將三笘薰如果再建功，就會追平名宿城彰二、柳澤敦嘅連續4場入波新人紀錄，肯定搏盡。其實喺復賽連勝旅途上面，川崎唯一未贏過嘅就係鯨魚，呢個月12號日聯盃作客，佢哋受制於名古屋嘅酷熱天氣，只能同對手打和2比2，今番聯賽再遇當然希望贏波。

　　鯨魚周中憑馬迪奧斯杜斯山度士補時入波，作客1比0擊敗湘南比馬後，由第5昇上第3位，今仗返主場迎戰前鋒，定必乘勇搶分，唔會坐以待斃。尤其球迷要注意一樣嘢，鯨魚喺日聯盃打和川崎場波，其實係陣容不整嘅，當時前鋒金崎夢生因為喺分組賽時未轉會，幫鳥棲砂岩上過陣，依例唔准披甲，攻守核心阿部浩之又養緊傷，唔可以夫添出擊，據講呢兩名大將今場多數擔正，更有本錢同川崎駁火。

　　論往績，雙方34次對戰川崎前鋒取得19勝8和7負嘅明顯優勢，但係客勝得1.62倍回報唔多吸引。再睇番川崎今季7場作客賽事，當中6次開4球或以上，有咁靚數據支持，今場大家精銳盡出，夾手夾腳入夠4球唔難，推介有2.45倍嘅入球大合理。