目前距離英超前四已經越嚟越遠嘅熱刺已經無太多失分空間，嚟緊禮拜三凌晨主迎更為落魄嘅韋斯咸，熱刺豈會放過如此搶分良機，各位波友又點可以錯過如此主標筍盤。

　　如果話熱刺主帥摩連奴近期已經夠煩惱嘅話，咁今仗對手韋斯咸嘅教頭摩耶斯恐怕有過之而無不及。喺復賽前9輪僅得1勝嘅困境下，首戰仍然未能痛定思痛，主場慘吞狼隊兩蛋。呢場失利，令到排名第17位嘅韋斯咸保組壓力進一步增大。不過摩耶斯手上可用嘅牌實在唔多，曾經充滿亮點嘅米查爾安東尼奧亦顯得孤掌難鳴。相比之下，摩連奴今仗迎來攻擊線大將迪利艾里解禁復出，而一復賽就有波入嘅荷蘭攻擊手貝維恩亦係熱刺是役重返勝軌嘅一大保證。

　　喺人腳方面，熱刺目前嘅3名傷患後衛祖安科夫、唐根加和鋒線小將柏洛特都唔會對輪換人手上有太大影響。但韋斯咸就明顯更為蝕章少少，三個後衛馬蘇亞古、奧邦拿、沙巴列達出戰成疑，而中場辛迪加斯和射手賀拿嘅齊齊缺陣令到球隊三線實力勢必有所下降。