今晚早場A組尼日利亞女足同南韓女足相遇爭開勝門。南韓首戰面對超班兼有主場之利嘅法國，大敗無可厚非，其實「太極虎」整體質素唔曳，今仗一眾女將只要調整好心態，面對牌面稍弱嘅尼日利亞，可以贏波保持出線機會，客勝屬不二之選。

　　南韓首戰面對法國明顯有啲怯場，隊長趙昭賢賽後都直言發揮失准：「見到球隊首戰表現唔出應有水准，我覺得好失望，不過我哋已經將失利拋諸腦後，集中精神應付嚟緊嘅小組賽事。」除咗呢位效力韋斯咸嘅中場外，車路士中場池笑然同神戶雌獅嘅「人氣王」李玟娥都喺國外聯賽搵食，南韓整體實力唔差得過一啲歐洲球隊。為擺脫上仗失利嘅陰霾，相信一班「太極虎」球員已經做好背水一戰嘅心理准備，第一步就係喺今晚取得小組首捷先。

　　超霸鷹患「恐亞癥」

　　相比之下，尼日利亞整體質素無疑較低，實力唔夠都算，最麻煩係同男足一樣，球員戰術意識極為薄弱，經常各自為戰。上仗面對挪威就慘吞3蛋，令人失望。呢支非洲「超霸鷹」雖然喺過去7屆都成功打入世盃決賽周，不過有6次小組就畢業，近3次決賽周面對亞洲球隊仲輸曬，表現毫無說服力，今場都好難同南韓搶分，捧番客勝好過。