今晚歐洲國家盃外圍賽F組爆發榜首大戰，「狂牛」西班牙主場迎戰瑞典。西班牙唔單止有「逆流卡叔」辛迪卡索拉翻生，隊長沙治奧拉莫斯過去1年披上「狂牛戰衣」每每化身「帶刀侍衞」，頻有士哥；瑞典方面亦有腳風轉順嘅古艾臣助陣，斗攻格局實多波入，2.5球嘅大盤乃不二之選。

　　西班牙自上年世盃後改由安歷基接手，頻頻換人試陣，除咗發掘具潛力新星外，亦會重召一些回勇老將，包括今次召入闊別「狂牛」4年嘅辛迪卡索拉。呢位曾經歷8次手術、幾乎要截肢嘅34歲老將，剛季重返維拉利爾不但奇跡復出，仲愈踢愈好，協助「黃色潛水艇」護級成功，從而獲「狂牛」重召。

　　辛迪卡索拉喺日前歐國外大勝法羅群島4比1之役擔正，下半場更代替被換走嘅「准新郎」沙治奧拉莫斯戴上隊長臂章，佢賽後都話夢想成真。無可否認，喺呢位「逆流卡叔」助陣下，西班牙由守轉攻都變得更加暢順。

　　沙治奧拉莫斯上仗被換出前亦頂入一粒，呢位西班牙隊長一向喺關鍵時刻建奇功，但好少連續不斷入波，不過佢過去1年變身「帶刀侍衞」，近7仗為「狂牛」披甲，竟然轟入6球，亦令佢累積19個士哥，躋身國家隊史上射手榜Top 10，僅次於韋拿、魯爾、費蘭度托利斯及布達堅奴等著名前鋒，認真犀利，難怪西班牙目前喺F組頭3場贏曬排榜首喇。

　　瑞典古艾臣腳風勁順

　　不過瑞典都唔失禮，於小組頭3場取得2勝1和排緊次席，前鋒古艾臣連續3場都有士哥，腳風勁順。呢位緬恩斯射手只係為瑞典上陣咗9場，就有5粒進帳，比起馬古斯貝治、約翰古達迪等老大哥更有效率。查實瑞典近4仗共轟10球，全開3球或以上，基於西班牙主勝得1.18倍冇肉食，讓球主客和要讓到兩球嫌辣得滯，既然兩軍踢法都咁進取，中位數2.5球嘅大盤有1.64倍值得捧場。