今日賽事唔多，以波蘭舉行嘅世青盃16強做主打，阿King度咗條過關，重心係「南美對決」，烏拉圭U20對厄瓜多爾U20。烏拉圭一向係世青盃常客，射手保羅洛迪古斯好運到暈，料可破厄瓜多爾殺入8強，烏拉圭讓平半，上盤有計。

　　烏拉圭U20在世青盃有不錯戰績，唔單止連續7屆闖入決賽周，近3屆更兩度殺入4強，今屆同樣保持強勢，分組賽3戰全勝以首名出線16強，上仗最後一場分組賽收起部分主力下，仍以2比0擊敗新西蘭U20，射手保羅洛迪古斯喺補時先至後備入替，竟喺末段執番粒，行運行到落腳趾尾，與隊友達雲龍尼斯同樣累積2球進帳，預計今仗會強陣出擊。另一邊廂，厄瓜多爾U20今屆表現麻麻，直至分組賽尾輪贏墨西哥U20才取得首勝，僅僅攞到其中一支最佳小組第3名身份晉級16強，以其實力難與烏拉圭抗衡。