哈囉！我係梁漢文，由今日開始我會《太陽波經》呢個欄同大家傾波經，認識我朋友都知道，唱歌、踢波兩樣係任我揀，我雖然揀唱歌，但係一樣咁鍾意睇波。

　　其實同好多香港年輕球迷一樣，我都係睇住英格蘭聯賽長大，所以對英格蘭特別有感情，當然亦特別熟悉，我好希望佢可以捧杯，繼一九六六年世界杯之後，三十八年再一次揚威國際球壇。

　　支持還支持，我係一個理智英格蘭擁躉，絕對唔會盲目睇好佢捧杯，因為我覺得由前中後三線去睇，英格蘭都有唔少問題，好似前鋒線咁，朗尼雖然當弗，但係冇大賽經驗，實際靠只得奧雲一個，好可惜佢今年狀態真係令人擔心，令到英格蘭全冇入波保證。

　　前面唔得，後面問題仲大。里奧費迪南停賽對英格蘭打擊好大，蘇甘保本身唔算一個穩健中堅，有里奧兜住仲好，依家要用泰利拍佢，賽前仲話有傷添，你話唔震就假。最得人驚係英格蘭個防線右路，永遠都有個計時炸彈—加利尼維利，上星期對冰島所失一球，又呢邊出現，艾歷臣如果解決唔到呢個問題，英格蘭幾難有好成績。